25. jan. Í dag byrjaði Emilíana B. Andrésdóttir hjá okkur í starfsnámi. Hún stundar nám í Lundarskóla en verður hjá okkur á miðvikudags- og föstudagsmorgnum þessa önn frá 8:15 - 13:00. Emilíana verður á Mána undir handleiðslu Hafdísar. Við bjóðum hana hjartanlega velkomna til okkar á Pálmholt.

Emilíana

24. jan. Nú er búið að setja inn á síðuna kennsluáætlun vorannar fyrir Regnboga. Byrjað var að kenna yfirreglurnar fjórar núna í janúar og svo er bætt við smám saman fram í maí. Innlögnin hefur gengið ljómandi vel það sem af er og börnin voða ánægð með Bros-orminn sinn sem vex og dafnar samhliða því sem þau tileinka sér að nota innirödd, fara eftir fyrirmælum, ganga vel um og gæta handa sinna og fóta :-) Sjá hér
Á Sól og Mána ætlum við að leggja megináherslu á yfirreglurnar fjórar á vorönn ásamt því að vinna markvissar með lausnaleit og leggja áherslu á heimspekilega gagnrýna umræðu um það sem snýr að  siðferðisvitund, eigin tilfinningum og annarra og efla þannig félagsfærni barnanna og hæfileikann að setja sig í spor annarra. Ekki er áætlað að vera með sérstaka SMT umbun á önninni eins og verið hefur heldur vinna enn meira með félagslegu hvatninguna.

20. jan. Í tilefni Bóndadags buðu börnin feðrum sínum í pabbakaffi og húsið fylltist af hressum og kátum pöbbum. Þeir feður sem ekki áttu heimangengt útveguðu sér staðgengil og því bættust nokkrir sprækir afar, frændur og mæður í hópinn. Boðið var upp á síld og rúgbrauð, salat og kex auk þess sem börnin tóku lagið og fullorðnir og börn hjálpuðust að við að útbúa kórónur fyrir þorrablótið okkar sem verður haldið næsta föstudag. Kærar þakkir fyrir ánægjulega stund í leikskólanum.

19. jan. Í vikunni byrjaði Izabela M. Dziubinska hjá okkur í vinnustaðanámi. Hún stundar nám við VMA en verður í starfsnámi hjá okkur á þriðjudags- og fimmtudagsmorgnum frá 8:00 - 12:00. Izabela verður aðallega á Regnboga undir handleiðslu Heiðdísar. Við bjóðum hana hjartanlega velkomna til okkar á Pálmholt.

Izabela

17. jan. Smávægilegar breytingar hafa verið gerðar á samstarfsáætlun leik- og grunnskóla fyrir vorönnina og eru foreldrar elstu barnanna hvattir til að kynna sér þær. Sjá hér

13. jan. Búið er að uppfæra foreldrahandbók leikskólans. Sjá hér

13. jan. Búið er að uppfæra viðbragðsáætlun leikskólans. Sjá hér

12. jan. Tilkynning frá skóladeild til foreldra í leikskólum á Akureyri

Á hverju ári berast skóladeild umsóknir þar sem foreldrar óska eftir að flytja börn sín milli leikskóla innan bæjarins. Að því tilefni vill skóladeild benda á eftirfarandi:

Aðalinnritun í leikskóla fer fram í apríl / maí ár hvert. Því er mikilvægt að allar beiðnir um flutning hafi borist skóladeild Akureyrar fyrir 30. mars ár hvert. Ef umsóknir berast eftir þann tíma er ekki hægt að tryggja að flutningur geti átt sér stað fyrir væntanlegt skólaár.

12. jan. Í dag kvöddum við Hönnu með virktum en hún hætti hjá okkur um áramótin. Krakkarnir gáfu henni risa Stubbaknús að skilnaði.

11. jan. Sumarlokanir leikskóla í Akureyrarbæ

Skólanefnd samþykkti eftirfarandi ályktun á fundi sínum 9. janúar 2012:

Skólanefnd samþykkir að sumarlokun leikskóla 2012 verði í tveimur tímabilum. Fyrra tímabilið verður frá 25. júní til 20. júlí og seinna tímabilið verður frá 9. júlí til 3. ágúst. Skólanefnd samþykkir að þetta fyrirkomulag verði sett upp til þriggja ára þar sem leikskólum er raðað niður á tímabilin. Þessi niðurstaða skólanefndar tekur mið af umsögnum sem bárust frá starfsmönnum leikskóla og foreldraráðum auk þess sem horft var til niðurstaðna foreldrakönnunar frá vori 2011.
Niðurröðun til næstu þriggja sumra má skoða hér

6. jan. Matseðlar til næstu tveggja vikna eru komnir á heimasíðuna. Þó svo að búið sé að samræma matseðla í leik- og grunnskólum þá hafa matráðar áfram svolítið val um hvaða uppskrift þeir velja t.d. þegar það er ofnbakaður fiskur eða hakkbollur og þar af leiðandi er ekki alltaf verið að bjóða upp á sama réttinn alls staðar þó svo að grunnhráefnið sé það sama. Sjá hér

6. jan. Námskrár deilda fyrir janúarmánuð eru komnar á heimasíðuna.

Máni
Regnbogi
Sól

6. jan. Fundargerð frá fundi foreldraráðs frá 21. nóv. s.l. er komin á heimasíðuna.

3. jan. Þær starfsmannabreytingar verða nú um áramótin að Hanna hættir hjá okkur og snýr sér alfarið að framhaldsnámi í sérkennslufræðum við HA. Í hennar starf kemur annar grunnskólakennari, Ingibjörg María Aadnegard. Hún verður í 75% starfi á Sólinni. Við bjóðum hana hjartanlega velkomna í starfsmannahópinn um leið og við kveðjum Hönnu með söknuði og velfarnaðaróskum.
 

Ingibjörg María

30. des. Frá 2. janúar 2012 eru matseðlar í öllum leik- og grunnskólum Akureyrarbæjar samræmdir. Gerðir hafa verið matseðlar sem rúlla á sjö vikna fresti og hafa næringarfræðingar og aðrir sérfræðingar komið að gerð þeirra til að tryggja að næringarefni séu við hæfi. Innan skamms mun verða hægt að skoða næringargildi við hverja hádegisverðarmáltíð. Hér má skoða alla matseðlana, uppskriftirnar og sýnishorn af næringarútreikningi http://akmennt.is/matur

23. des.
Við óskum nemendum
okkar, foreldrum, systkinum, öfum
og ömmum ásamt öllum öðrum velunnurum
Pálmholts gleðilegra jóla og farsældar á nýju ári,
bæði í leik og starfi. Kærar þakkir fyrir ánægjulegt samstarf
á árinu sem er að líða og við hlökkum til áframhaldandi samveru og
samvinnu á árinu
2012.
 

23. des. Matseðill fyrir næstu tvær vikur er kominn á heimasíðuna. Vakin er athygli á samræmdum matseðlum fyrir alla leik- og grunnskóla Akureyrarbæjar sem taka gildi frá næstu áramótum.

22. des.

Til að ganga úr skugga um að búið væri að losa pappír á þeim stöðum þar sem allt var yfirfullt í gær fóru aðstoðarmenn slökkviliðsins aftur á stúfana í dag. Eftir ferðina var hægt að merkja við „í lagi“ alls staðar og aðstoðarmennirnir sáttir.

21. des.

Í dag fóru tveir aðstoðarmenn slökkviliðsins úr elsta árgangi í eftirlitsferð um skólann ásamt Nunnu. Allur neyðarbúnaður var í góðu lagi og aðgengi að útgönguleiðum sömuleiðis. Þó var gerð athugasemd við pappírssöfnun á þremur stöðum og því ákveðið að farin yrði önnur eftirlitsferð á morgun til að ganga úr skugga um að allt yrði í sómanum fyrir jólin.

16. des. Jólaball Pálmholts var haldið í dag og fór að vonum vel fram eins og alltaf. Jólasveinarnir Kjötkrókur og Hurðaskellir mættu galvaskir og sá fyrrnefndi með nýreykt hangilæri sem ilmaði dásamlega en sá síðarnefndi var óvenju prúður en gat þó ekki setið á sér og skellti að minnsta kosti einni hurð. Allir skemmtu sér vel og eftir dans og söng var boðið upp á nýbakaðar smákökur úr eldhúsinu. Aðstandendur fá kærar þakkir fyrir ánægjulega samverustund.

16. des. Matseðill mæstu viku er kominn á síðuna. Skoðið hér

12. des. Hér má skoða niðurstöður úr könnun sem lögð var fyrir foreldra leikskólabarna síðast liðið vor.

12. des. Hér má skoða ákvarðanir skólanefndar um breytta gjaldskrá leikskóla og breytingar á matseðlum leikskólanna.

12. des. Matseðill vikunnar er kominn á sinn stað.

2. des. Jólaföndurdagurinn heppnaðist ljómandi vel og voru foreldrar sérdeilis duglegir að mæta og eiga góða stund með sínu barni. Ekki spillti fyrir að börnin buðu foreldrum sínum á kaffihúsið Regnboga þar sem jólatónlist ómaði og allir fengu eitthvað gott að maula. Aðstandendur fá kærar þakkir fyrir samveruna. Myndir verða settar á sameiginlega myndasíðu heimasíðunnar en munu líka rúlla í starfrænu römmunum í fataherbergjum deilda en þeir hafa vakið verðskuldaða athygli bæði barna og foreldra.

2. des. Matseðill næstu viku er kominn á sinn stað. Sjá hér

28. nóv. Föstudaginn 2. desember verður hinn árlegi jólaföndurdagur á Pálmholti en þá er foreldrum boðið að koma og föndra auðvelt jólaföndur með sínum börnum og skera út í laufabrauð. Hægt er að velja um að koma fyrir eða eftir hádegi og hanga skráningarlistar uppi  í fataherbergjum deilda.

28. nóv. Í gær var fyrsti sunnudagur í aðventu og af því tilefni komu allir saman í Skýjaborg í morgun þar sem kveikt var á fyrsta aðventukertinu og sungin jólalög.

28. nóv. Í síðustu viku var haldinn barnafundur í árgangi 2007. Þetta er annar fundurinn sem haldinn er með stuttu millibili og greinilegar framfarir hjá börnunum  að tjá sig fyrir framan félagana. Umræðuefni fundarins var Holtið og viðfangsefni þar.

28. nóv. Hér má sjá matseðil vikunnar

18. nóv. Matseðil næstu viku má nálgast hér.

7. nóv. Á deildarsamkomu á föstudaginn komu allir saman og fluttu söngva og þulur hverjir fyrir aðra. Hér má sjá mynda af yngstu börnunum sem sungu um dúkkuna hennar Dóru og skemmtu bæði sér og öðrum.

7. nóv. Í dag byrjuðu tveir sænskir leikskólakennaranemar í vettvangsnámi hjá okkur. Þær heita Jessica og Sofia og verða á Sól undir handleiðslu Helen fram í byrjun desember.

4. nóv. Í gær voru haldnir barnafundir í tveimur elstu árgöngunum. Umræðuefnið var tengt þróunarverkefni leikskólans um hringrásir og siðfræði. Börnin veltu því fyrir sér hvað þau ættu að festa á spýtu sem þau ætla að grafa í jörðina. Gerist eitthvað í moldinni? Næsta vor fæst vonandi botn í málið þegar spýturnar verða grafnar upp. Börnin voru mjög dugleg að stíga í pontu. Sum lögðu til málanna en fyrir aðra var æfingin að koma fram fyrir hópinn aðalatriðið og sýndu börnin mikið hugrekki. Hér má sjá nokkrar myndir.

28. okt. Hér má skoða matseðil næstu þriggja vikna.

28. okt. Í dag var haldin brunaæfing og gekk hún mjög vel fyrir sig. Slökkvilið og Eldvarnareftirlit mættu á staðinn og fylgdust með framkvæmdinni.

27. okt. Hér má sjá myndir frá samsýningu elstu nemenda Pálmholts, Flúða, Lundarsels og Lundarskóla um Búkolluverkefnið sem unnið var í tengslum við þróunarverkefnið Leikum og lærum. Börnin sungu, fluttu leikrit og sýndu verkefnavinnu og skráningar.

26. okt. Síðustu vikurnar hafa elstu börnin verið að vinna markvisst með söguna Búkollu en það er liður í þróunarverkefni leikskólanna þriggja, Pálmholts, Flúða og Lundarsels, og Lundarskóla, Leikum og lærum. Börnin hafa útbúið helli og sögusvið ásamt öllum sögupersónum í Búkollu. Þau hafa hlustað á söguna, unnið með orð úr sögunni og lært Búkollusöng svo eitthvað sé nefnt. Á morgun verður haldin samsýning allra skólanna í Lundarskóla og hafa nemendur verið að leggja lokahönd á undirbúninginn með dyggum stuðningi kennaranna sinna, þeirra Helen og Nunnu.

Hér má sjá nokkur barnanna með verkin sín.

Hér eru Sjöfn og Helen að velta fyrir sér hvaða texti passi við myndaskráningu sem gerð var.

25. okt. Snjórinn getur svo sannarlega verið gleðigjafi og er stórkostlegur efniviður sem hægt er að nota til að skapa hvaðeina sem mönnum dettur í hug. Snjókarlar og kerlingar eru þó án efa vinsælasta viðfangsefnið og í gær voru hendur látnar standa fram úr ermum eins og sjá má á myndinni.

19. okt. Í dag kl. 16:15 verða tveir fyrirlestrar í tengslum við þróunarverkefni leikskólans um Hringrásir allan ársins hring. Bryndís Indíana Stefánsdóttir verður með kynningu á útikennslu og Jórunn Elídóttir fræðir okkur um starfendarannsóknir. Áhugasömum foreldrum er velkomið að sitja fræðslufundinn sem verður haldinn á Sól.

19. okt. Þessa viku eru foreldraboð á öllum deildum og hefur hver árgangur sinn dag til að bjóða pabba og mömmu upp á kaffisopa og heimabakkelsi. Börnin í árgöngum 2007 og 2008 buðu upp á dýrindis brauðbollur sem þau bökuðu, árgangur 2006 bakaði gersnúða sem boðið verður upp á í dag og á morgun ætla yngstu börnin í árgangi 2009 að bjóða foreldrum sínum að koma og borða hafragraut með sér. Þetta eru alltaf mjög skemmtilegir dagar og gaman hvað margir geta komið.

10. okt. Hér má skoða samstarfsáætlun Pálmholts, Flúða, Lundarsels og Lundarskóla um aðlögun og samstarf milli skólastiganna.

10. okt. Matseðill til tveggja vikna er kominn á heimasíðuna. Sjá hér.

7. okt. Í dag var haldin deildarsamkoma á Mána þar sem allar deildir komu saman og fluttu söngva og þulur. Þetta var hin besta skemmtum og áætlað að deildir bjóði til sín til skiptis í hverjum mánuði. Hér má sjá myndir frá flutningnum.

7. okt. Í vikunni fóru fulltrúar starfsmanna í umhverfisnefnd á fund sem Landvernd stóð fyrir og haldinn var á Stórutjörnum fyri skóla á grænni grein og grænfánaskóla. Fundurinn var fróðlegur og styrkjandi fyrir nefndina og vonandi á það eftir að skila sér inn í starfið á Pálmholti.

4. okt. SMT-kennsluáætlanir haustannar fyrir Sól og Mána eru komar á heimasíðuna.

4. okt. Námskrár og fréttapistlar deilda fyrir októbermánuð eru komin á heimasíðuna. Máni, Regnbogi og Sól.

4. okt. Í gær fór Heiðdís með nokkur af yngstu börnunum í fyrstu göngu- og kerruferð haustsins. Ferðinni var heitið í Rauða krossinn með teppi sem skólinn er hættur að nota og fengu þau miklar þakkir fyrir.

4. okt. Í gær fengum við heimsókn frá fyrrverandi nemendum okkar sem nú eru komnir í 1. bekk í Lundarskóla. Þau komu ásamt Hrefnu kennaranum sínum, léku sér, spjölluðu og sungu fyrir elstu nemendur á Pálmholti. Þetta er liður í að tengja saman skólastigin og auðvelda aðlögun á milli þeirra. Pálmholt, Flúðir, Lundarsel og Lundarskóli vinna eftir samstarfsáætlun sem verður aðgengileg á heimasíðunni innan skamms. Hér má sjá mynd af okkar „gömlu“ nemendum með óskasteinana sem þeir útbjuggu í leikskólanum í vor og tóku nú með sér heim.

26. sept. Matseðil leikskólans til næstu tveggja vikna má skoða hér.

23. sept. Á Aðalfundi foreldrafélagsins sem  haldinn var á Pálmholti í gær var kosin ný stjórn í Foreldrafélag Pálmholts. Einnig var kosið í Foreldraráð Pálmholts, fulltrúar foreldra í Umhverfisnefnd skólans kosnir ásamt tengilið foreldra í þróunarverkefninu Leikum og lærum. Drög að starfsreglum Foreldraráðs voru lögð fram og þau samþykkt, Einnig voru samþykktar lagabreytingar á lögum Foreldrafélagsins. Hér má skoða starfsreglur Foreldrafélagsins en nöfn nýrra fulltrúa í stjórn og ráð ásamt lögum félagsins er að finna á tenglunum Foreldraráð, Foreldrafélagið og Grænfáninn til vinstri á síðunni. Tengiliðir foreldra við þróunarverkefnið Leikum og lærum eru Dagný Reykjalín, Eyrún K. Gunnarsdóttir og Kristín Hilmarsdóttir.

23. sept. Pálmholt hefur hlotið tvo styrki úr Sprotasjóði, þróunarsjóði leik-, grunn og framhaldsskóla. Annars vegar er um að ræða þróunarverkefni um umhverfi og siðfræði sem við köllum Hringrásir allan ársins hring. Verkefnið verður að mestu unnið með tveimur elstu árgöngunum og eru leikskólakennararnir Ólöf Pálmadóttir og Sigrún Ella Meldal verkefnisstjórar. Hins vegar er um að ræða sameiginlegt verkefni leikskólanna Pálmholts, Flúða og Lundarsels og Lundarskóla sem við nefnum Leikum og lærum. Markmið þess verkefnis er að þróa og efla samstarf milli skólanna með það í huga að auðvelda elstu nemendum leikskólans að hefja grunnskólagöngu.  Einnig er markmið að samræma aðferðir til lestrarkennslu í skólunum fjórum. Tengiliður Pálmholts við verkefnið er Helen H. Ármannsdóttir aðstoðarskólastjóri.

22. sept. Í dag klukkan 17:30 er aðalfundur foreldrafélagsins. Foreldrar eru hvattir til að mæta vel og kynna sér öflugt starf félagsins. Einnig mun foreldraráð leggja fram drög að starfsreglum og kosið verður í nýtt ráð. Þá mun skólastjóri segja nokkur orð um innra starf skólans og fleira.

22. sept. Fundargerðir foreldraráðs frá maí og september eru komnar á heimasíðuna. Sjá hér og hér

14. sept. Í dag var haldinn kynningarfundur fyrir foreldra barna á Mána. Kennarar á deildinni fóru yfir helstu áherslur í starfinu, kynntu kennsluefni og starfshætti deildarinnar ásamt því að svara fyrirspurnum. Á föstudag verður samskonar kynningarfundur fyrir foreldra á Sól en Regnbogi kynnti starfið sitt fyrir foreldrum á aðlögunardögunum. Hér má sjá nokkrar myndir frá fundinum á Mána.

9.sept. Í dag fengum við skemmtilega heimsókn. Brynja og Lára Sóley úr Sinfóníuhljómsveit Norðurlands komu til okkar með kveðju frá Maximús Músíkús. Börnin voru að sjálfsögðu til fyrirmyndar.

7.sept.Í sumar höfum við verið dugleg að fylgjast með matjurtagarðinum okkar og loksins var komin tími til að taka um grænmetið. Allir skemmtu sér hið besta þó svo vindurinn og rigningin hefði aðeins verið að stríða okkur.

Fleiri myndir væntanlegar á sameiginlega myndasíðu.

6.sept. Í dag og í gær höfum við haft sænskan gest frá vinabænum okkar í Västerås. Hún heitir Ingela Viskell Rasa og vinnur sem ráðgjafi í leikskólum þar sem lögð er áhersla á stærðfræði og málörvun. Ingela hefur fylgt Helen í starfi á Sól en líka sagt okkur frá sínu starfi.

2. sept. Búið er að setja inn myndir af nýja starfsfólkinu á tengilinn starfsfólk.

2. sept. Í dag vann Berglind Bergvinsdóttir sinn síðasta dag í bili á Pálmholti en hún heldur áfram í námsleyfi og stundar meistaranám við HA ásamt Sigrúnu Finnsdóttur. Berglind kemur aftur úr leyfi 1. janúar nk. en Sigrún 1. júní 2012. Við óskum þeim velfarnaðar í náminu um leið og við þökkum fyrir samstarfið í sumar.

2. sept. Í dag byrjaði nýr starfsmaður hjá okkur í 100% starfi. Hún heitir Hafdís Yurith Zabdid Ólason og verður að leysa af á öllum deildum þannig að öll börnin og foreldrarnir eiga eftir að kynnast henni. Við bjóðum Yurith hjartanlega velkomna til okkar. Nú er fullskipað á Pálmholti bæði í starfsmanna- og nemendahópnum :-)

2. sept. Í gær tókum við á móti 19 leikskólakennurum frá Finnlandi, Noregi, Danmörku, Íslandi og Svíþjóð. Gestirnir fengu kynningu á starfi skólans í máli og myndum og þáðu kaffi og hressingu. Börnin vildu ekki láta sitt eftir liggja og sungu fyrir gestina, útbjuggu fána landanna og færðu þeim óskasteina.

31. ág. Matseðil næstu vikna má skoða hér

31. ág. Síðustu tvo dagana höfum við haft góðan gest frá Västerås í heimsókn. Það er Maria Malm sem er leikskólastjóri í einum af leikskólunum sem starfsfólk Pálmholts heimsótti í júní. Á morgun e.h. eigum við von á heimsókn frá rúmlega tuttugu leikskólakennurum frá vinabæjum norðurlandanna en þeir sitja allir  samnorræna leikskólaráðstefnu í Hofi. Á mánudag fáum við svo annan sænskan leikskólakennara til okkar. Hún heitir Ingela og verður hjá okkur í tvo daga.

26. ág. Þessa vikuna höfum við verið að kveðja starfsmenn samhliða því að taka á móti  nýjum börnum og nýju starfsfólki. Berglind Ólafsdóttir, Alfa Dröfn Jóhannsdóttir og Baldvina Björk Jóhannsdóttir hættu allar í vikunni og voru kvaddar með virktum. Þær eru allar að fara í háskólanám og óskum við þeim velfarnaðar á nýjum vettvangi. Þrír nýjir starfsmenn byrjuðu hjá okkur á miðvikudaginn. Allt eru það nýútskrifaðir grunnskólakennarar og bjóðum við þá hjartanlega velkomna í hópinn. Þær eru Jóhanna Aðalbjörg Bergsdóttir sem verður á Sól, Þórdís Eva Þórhallsdóttir verður á Regnboga og Sigrún Kristín Jónsdóttir á Mána. Þær verða í 40 - 60% stöðum e.h.

19. ág. Matseðill fyrir næstu viku er kominn á heimasíðuna. Sjá hér

19. ág. Leikskólinn opnaði s.l. þriðjudag eftir fjögurra vikna lokun og miklir fagnaðarfundir hjá mörgum sem voru farnir að hlakka til að koma aftur á Pálmholt. Yngstu börnin sem byrjuðu í sumar hafa langflest komið keik aftur þó svo að sumum reynist það erfiðara en öðrum. Í gær var haldinn kynningarfundur fyrir nýja foreldra sem áætlað er að byrji með börn sín í aðlögun 22. ágúst. Tólf foreldrar frá átta börnum mættu en 11 börn eiga að byrja aðlögun í næstu viku.

15. júlí. Leikskólinn lokar frá 18. júlí til og með 15. ágúst. Við opnum aftur með bros á vör þriðjudaginn 16. ágúst og hlökkum til að hitta bæði börn og foreldra eftir ævintýri sumarleyfisins :-)

15. júlí. Í dag var síðasti dagur margra af elstu börnunum sem hefja grunnskólagöngu sína í ágúst. Af því tilefni tóku foreldrar barnanna sig til og pöntuðu ísbíl á Pálmholt við mikla hrifningu barnanna. Myndir af herlegheitunum má skoða á myndasíðu leikskólans.

11.júlí. Í gær skein sólin glatt og voru börnin því mestmegnis úti. Kl 15:00 var hitinn orðinn 22°°C og því höfðum við auka sulludag.

Hér eru fleiri myndir frá góðum degi.

1. júlí. Hér má skoða matseðil leikskólans fyrir næstu tvær vikur og fyrstu viku eftir lokun.

1.júlí. Í dag var íþróttadagur hjá okkur. Börnin gerður hinar ýmsu æfingar úti og skemmtu sér konunglega.

Fleiri myndir má finna hér

29. júní. Skóladagatal Pálmholts fyrir skólaárið 2011 - 2012 má skoða hér

29. júní. Glóðvolgt eintak af umhverfisfréttablaðinu Blóminu sem Pálmholt gefur út er komið á heimasíðuna og má skoða hér

21. júní. Matseðillinn er kominn á heimasíðuna. Sjá hér

20.júní. Í dag settum við niður hinar ýmsu matjurtir í garðinn okkar góða. Spennandi verður svo að fylgjast með í sumar og smakka á lostætinu í haust.

Fleiri myndir má finna hér

10. júní. Hér koma nokkrar myndir frá afmælishátíð leikskólans sem tókst í alla staði ágætlega og ekki spillti sólarglennan fyrir sem gladdi okkur með nærveru sinni. Fleiri myndir verða settar á myndasíðu eftir hvítasunnuhelgina.

9. júní. Á morgun verður mikið um dýrðir á Pálmholti því þá höldum við upp á 61 árs afmæli leikskólans, en afmælisdagurinn er þann 11. júní. Fulltrúi á vegum Landverndar mun koma kl. 10:40 og afhenda okkur grænfánann í þriðja sinn fyrir umhverfisstarf. Að því búnu verða elstu nemendur skólans útskrifaðir með formlegum hætti og síðan verður slegið upp grillveislu þar sem foreldrum og systkinum er boðið. Stjórn foreldrafélagsins ætlar ekki að láta sitt eftir liggja og munu valinkunnir fulltrúar foreldra stjórna leikjum. Að undanförnu hafa veðurguðirnir ekki beinlínis verið að bjóða upp á kjöraðstæður til útisamkomu en við vonum það besta og biðjum fólk að klæða sig eftir veðri.

6. júní. Nú er sumarfólkið okkar allt mætt til starfa. Berglind Bergvinsdóttir mætti til starfa 1. júní og verður hjá okkur á Sól fram í ágúst en þá heldur hún aftur í skóla fram að áramótum. Í dag komu svo þrír unglingar til starfa, þau Emilíana (Emma), Sóley og Ægir. Emma verður á Mána en Ægir og Sóley á Sól. Við bjóðum þau öll velkomin á Pálmholt.

3. júní. Í dag settu börnin á Sól og Mána niður kartöflur í nýja matjurtagarðinn okkar. Hér má finna myndir af áhugasömum börnum. Það verður spennandi að sjá hvað kemur upp úr kartöflubeðunum í haust. Það var líka sulludagur í dag og börnin tóku til við sullið  eftir heimsóknina í matjurtagarðinn. Hér eru myndir af því.

31. maí. Pálmholt sótti á dögunum um styrk í Sprotasjóð, þróunarsjóð leik-, grunn- og framhaldsskóla, til að þróa með enn markvissari hætti umhverfisstarf skólans. Í gær fengum við að vita að styrkur að upphæð 1.8 milljón fékkst úr sjóðnum. Unnið verður sérstaklega með hringrásir í náttúrunni og nefnist verkefnið Hringrásir allan ársins hring. Einnig sóttu Pálmholt, Flúðir, Lundarsel og Lundarskóli um styrk í sama sjóð með það í huga að efla samstarf leikskólanna þriggja og Lundarskóla. Verkefnið nefnist Leikum og lærum saman. Þar fékkst styrkur að upphæð 1.0 milljón. Bæði verkefnin byrja næsta haust og afar ánægjulegt að fá styrki til að sinna þeim.

31. maí Í dag fóru börnin á Mánadeild saman í matjurtagarðinn til að undirbúa reitinn fyrir kartöfluniðursetningu. Eins og sjá má á myndunum tóku börnin virkan þátt í vinnunni.

27. maí. Hér má skoða matseðla næstu tveggja vikna.

26.maí. Í gær var dagur elstu barnanna og mikil gleði ríkjandi í hópnum enda fengu börnin að velja matseðilinn í hádeginu og höfðu síðan leikskólann út af fyrir sig milli fimm og sjö. Farið var í fjársjóðsleit, flatbökur útbúnar, dansað, sungið og leikið og að lokum voru pitsurnar snæddar af bestu lyst. Myndir má sjá á myndasíðu Sólar.

26. maí. Í dag mætti Sigrún Finnsdóttir aftur til starfa eftir námsleyfi frá s.l. hausti. Hún verður fyrsta mánuðinn á Mána og síðan á Sólinni fram að sumarlokun. Þá heldur hún aftur í námsleyfi til næsta vors. Við bjóðum Sigrúnu velkomna til okkar.

19. maí. Mánudaginn 23. maí byrja tveir sumarstarfsmenn hjá okkur. Það eru þær Heiðdís Sesselja Guttormsdóttir og Rósa Ösp Traustadóttir. Við bjóðum þær velkomnar til starfa.

19. maí. Í dag fóru tveir elstu árgangarnir í sveitaferð fram í Kristnes. Það er alltaf jafn gaman að fara í þessar ferðir sama hvort sólin skín eða regnið vætir jörð og þá sem úti eru. Geiturnar voru ekki lengur til staðar og því engin hætta á að „stungurnar“ kæmu út úr götunum (hornin gegnum girðinguna) eins og ein orðaði það svo skemmtilega. Myndir eru komnar á myndasíður deilda.

12. maí. Hér má sjá matseðil vikunnar og þeirra næstu.

Sveitaferð og heimsókn til slökkviliðsins
Í dag, 11 maí, fóru börnin á Regnboga og Mánabörn í árgangi 2007 í Sveitaferð að Kristnesi. Þann 19. maí munu síðan árgangur 2006 frá Mána og Sólarbörn fara í sveitaferð. Í morgun fór útskriftarárgangurinn í heimsókn á slökkviliðsstöðina. Myndir eru komnar á síður deilda.

9. mars. Alltaf er nú jafn gaman í leikskólanum á öskudaginn og létu menn ekki smá hríð aftra sér frá því að fara í grímubúningunum sínum um nágrenni Pálmholts og syngja fyrir starfsfólk í verslunum og fyrirtækjum. Þegar heim var komið var kötturinn sleginn úr tunnunni en þar reyndist vera fullt af poppi sem börnin gæddu sér á. Í hádeginu var boðið  upp á pylsur með öllu og setti Sólin upp pylsusjoppu af því tilefni. Þar var pylsan seld á 110 krónur sem hlýtur að vera lægsta verðið á landinu :-) Börnin á Regnboga heimsóttu bæði matráð og skólastjóra og sungu fyrir þá við mikla hrifningu.

3. mars. Búið er að uppfæra viðbragðsáætlun Pálmholts vegna inflúensu. Sjá hér

1. mars. Matseðil næstu þriggja vikna má skoða hér.

22. feb. Nú er Hafdís byrjuð á PMT- grunnnámskeiði og mun hún sækja fjórar tveggja daga lotur á vorönninni. Fyrsta lotan er búin en næstu lotur eru 2. og 3. mars, 4.og 5. apríl og 12. og 13. maí. Hafdís er sjöundi starfsmaðurinn á Pálmholti sem sækir þessa grunnmenntun í PMT og erum við að vonum stolt af því að geta byggt svo vel undir þessa stoð sem agastefna SMT- skólafærninnar er.

21. feb. Í dag mættu nemarnir okkar frá Menntavísindasviði HÍ, þær Anna Steinunn og Eva Dís. Þær verða hjá okkur næstu tvær vikurnar og eru nú að kynna sér samskipti, samstarf og stjórnun ásamt náttúru, samfélagi og listum í leikskóla. Anna Steinunn verður aðallega á Regnboga og Eva Dís á Sól. Þetta er síðasta önnin þeirra í leikskólakennaranáminu og útskrifast þær sem leikskólakennarar í vor. Við bjóðum þær velkomnar til okkar á Pálmholt. Myndir af þeim stöllum eru undir starfamannatenglinum.

17. feb. Í gær sendi Pálmholt Landvernd skýrslu um umhverfisstarfið hér á Pálmholti s.l. tvö ár ásamt nýrri umsókn um grænfánann til næstu tveggja ára. Það er ekki sjálfgefið að skólar fái endurnýjun á umhverfisviðurkenningunni sem grænfáninn felur í sér en við leyfum okkur að vera bjartsýn þar sem mikil gróska hefur verið í umhverfismennt þennan tíma. Hér má lesa skýrsluna en Sigrún Ella Meldal á heiðurinn af samantektinni og fær bestu þakkir fyrir vandaða vinnu. Prentuð voru út tvö eintök til að hafa í forstofum og geta foreldrar því einnig skoðað skýrsluna þar.

Hér má sjá stolta umhverfisnefnd Pálmholts hampa skýrslunni.

17. feb. Í dag buðu börnin mæðrum sínum í kaffi í tilefni af væntanlegum konudegi. Börnin höfðu bakað gómsætar gulrótarbollur sem runnu ljúflega niður með osti og heimagerðu marmelaði. Síðan tóku við ýmis viðfangsefni á deildum. Á Sól spruttu fram litrík lófablóm í gluggum, á Regnboga var teiknað eftir höndum og á Mána teiknuðu mæður og börn sjálfsmyndir. Drengirnir á Sól tóku sig til og sungu hraustlega fyrir stúlkurnar á deildinni en þær höfðu gert slíkt hið sama fyrir þá á Bóndadaginn. Hér má sjá nokkrar myndir frá stundinni en fleiri eru væntanlegar á myndasíðum deilda.

14. feb. Matseðill næstu tveggja vikna er kominn á síðuna.

14. feb. Í síðustu viku var bryddað upp á sérstakri hrósviku meðal starfsmanna á Pálmholti. Starfsmenn leituðust við að hrósa hver öðrum markvisst í anda SMT- skólafærninnar í þeim tilgangi að verða enn færari í hvatningu og nákvæmu hrósi í garð barnanna. Það kom glöggt í ljós að það er ekki bara börnunum sem þykir gott að fá uppbyggilegt hrós og stundum gleymist að setja orð á það sem vel er gert og litið á það sem sjálfsagðan hlut. Verum minnug þess að hrós styrkir okkur öll og hvetur til góðra verka.

11. feb. Ársskýrsla Pálmholts fyrir skólaárið 2009 - 2010 er komin á heimasíðuna. Þar má finna ýmsar gagnlegar og fróðlegar upplýsingar um skólastarfið. Nú er unnið að breytingum á uppsetningu næstu ársskýrslu þannig að innihald hennar gagnist sem best í mati á skólastarfi. Trausti Þorsteinsson hjá Miðstöð skólaþróunar HA hefur unnið að endurbótunum. Áætlað er að ljúka ársskýrslu fyrir skólaárið 2010 - 2011 n.k. sumar.

9. feb. Að undanförnu hafa kennarar verið duglegir að setja myndir á myndasíður deilda og eru foreldrar hvattir til að skoða þær. Þar má m.a. sjá endurvinnsluverkin, myndir úr fyrsta danstímanum, Búkolluverkefni Mána og ferð á Holtið.

9. feb. S.l. föstudag hófst danskennsla á Pálmholti. Foreldrafélagið kostar kennsluna sem verður í fjögur skipti, á föstudögum, og sér Eva Reykjalín um kennsluna.
 

Dagur leikskólans Þann 6. febrúar er Dagur leikskólans og verður hann haldinn hátíðlegur um land allt. Á Akureyri mun verða sett upp sýning á Amtsbóka- og Héraðsskjalasafninu. Þar verður m.a. hægt að skoða ýmis heimagerð námsgögn sem unnin hafa verið í leikskólum bæjarins. Sýningin mun standa allan febrúarmánuð. Í Pennanum Eymundsson verða sett upp listaverk eftir foreldra og nemendur á Pálmholti og er yfirskriftin "Sjálfsmynd úr endurnýtanlegum efnivið". Sú sýning verður sett upp 3. febrúar og mun standa í einhverja daga. Þessu til viðbótar tekur Pálmholt þátt í stuttmyndasamkeppni á vegum Félags leikskólakennara og Félags Stjórnenda í leikskólum.

3. feb. Í dag var sýningin „Sjálfsmynd úr endurnýtanlegum efnivið“ sett upp í gluggum Pennans Eymundsson. Sýningin er samvinnuverkefni foreldra og barna á Pálmholti og sett upp í tengslum við Dag leikskólans. Á sýningunni gefur að líta einstaklega skemmtileg verk þar sem hugmyndaauðgi og sköpunarhæfni hefur sannarlega fengið að njóta sín. Foreldrar fá hjartans þakkir fyrir að leggja hugmyndinni lið og „líf“. Sýningin mun standa fram til 15. febrúar.   

31. jan. Matseðill fyrir næstu tvær vikur er kominn á heimasíðuna. Sjá hér

31. jan. Námskrár deilda fyrir febrúarmánuð eru komnar á heimasíðuna.

Máni. Regnbogi. Sól

24. jan. Matseðillinn fyrir þessa viku er kominn á heimasíðuna. Sjá hér

20. jan. Samstarf leikskólanna þriggja á efri brekkunni og Lundarskóla er  sífellt að styrkjast og á þessari önn munum við fá að sjá enn meira af nemendum úr 6. bekk sem ætla að koma nokkrum sinnum á önninni og lesa fyrir börnin eins og þau gerðu í tvígang á haustönninni. Einnig munu samskipti 6. bekkinga og elstu nemenda leikskólanna verða efld. Hér má sjá samstarfsáætlun skólanna fyrir vorönnina.

20. jan. Við höldum ótrauð áfram með SMT- skólafærnina okkar og erum nú búin að gera kennsluáætlun fyrir vorönnina. Á Regnboga er verið að byrja að leggja inn fyrstu reglurnar en á Sól og Mána er haldið áfram að rifja upp reglur og viðhalda jákvæðum aga ásamt því að bæta við lausnaleit síðar á önninni. Allt gengur þetta ljómandi vel og hefur góð áhrif inn í skólasamfélagið. Hér má sjá kennsluáætlanir vorannar:

Máni
Regnbogi
Sól

17. jan. Matseðil vikunnar má skoða hér.

7. jan.

6. jan. Skólanefnd hefur samþykkt sumarlokunartímabil leikskóla Akureyrar til næstu þriggja sumra. Sjá hér

3. jan. Nýtt umhverfisfréttabréf Pálmholts, Blómið, er komið út. Sjá hér

3.  jan.  Ný gjaldskrá fyrir leikskóla Akureyrarbæjar frá 1. jan. 2011. Sjá hér
Breyting á gjaldskránni er sú að dvalargjaldið hækkar um 10 % og fæðið um 5 %. Ef báðir foreldrar eru án atvinnu greiða þeir lægra gjaldið að því tilskyldu að skilað sé vottorði frá Vinnumálastofnun.

Námskrár deilda fyrir janúar 2011 eru komnar á netið
Máni
Regnbogi
Sól

Við óskum öllum leikskólabörnum á Pálmholti og fjölskyldum þeirra gleðilegra jóla og farsældar á nýju ári. Við þökkum kærlega fyrir einstaklega gott og gefandi samstarf á liðnu ári og væntum þess að svo verði áfram um ókomna framtíð. Hátíðarkveðjur frá starfsfólki Pálmholts

23. des. Matseðill fyrir næstu þrjár vikurnar er kominn á heimasíðuna. Sjá hér

14. des. Skóladagatali Pálmholts fyrir skólaárið 2010 - 2011 hefur verið breytt til samræmis við óskir starfsmanna um breytta dagsetningu skipulags- og námskeiðsdaga. Þetta er gert með samþykki skólanefndar, foreldraráðs og stjórnar foreldrafélagsins. Sjá hér

14. des. Nú eru jólasveinarnir komnir til byggða og spenningur hjá sumum börnum orðinn svo mikill að þau spretta upp fyrir allar aldir til að gá að sveinka. Aðrir eru minna hrifnir og vilja sem minnst af þessum rauðklæddu og skeggjuðu furðufuglum vita. Þetta fengum við að að sjá og heyra á Jólaballinu okkar sem haldið var í samvinnu við foreldrafélagið s.l. föstudag. Allt fór vel fram og var þátttaka foreldra 100% og afar ánægjulegt að sjá hvað foreldrar eru miklir þátttakendur í skemmtuninni.

10. des. Í morgun gerðust fimm börn í elsta árgangi aðstoðarmenn slökkviliðsins. Þau fóru ásamt skólastjóra um skólahúsið og athuguðu hvort brunavarnir væru fullnægjandi og reyndist svo vera í öllum rýmum. Hér má sjá mynd af hinum vösku aðstoðarmönnunum.

7. des. Í dag fengum við góða gesti á Pálmholt en þar voru á ferðinni kvenfélagskonur úr kvenfélaginu Hlíf, þær Birgit Schov formaður og Sigríður Garðarsdóttir gjaldkeri. Eins og margir vita rak kvenfélagið Hlíf barnaheimilið Pálmholt frá 1950 - 1971 og gáfu síðan Akureyrarbæ hús, lóð og allan búnað árið 1972. Það er því sterk taug milli leikskólans og kvenfélagsins og kom hún berlega í ljós á 60 ára afmæli skólans í sumar þegar kvenfélagið gaf skólanum veglegt gjafabréf. Ákveðið hefur verið að verja upphæðinni til kaupa á þremur stafrænum myndarömmum sem komið verður fyrir í fataherbergjum deilda. Hér má sjá þær stöllur þar sem þær litu inn í dag og afhentu gjöfina.
 

6. des. Litlu jól verða á Pálmholti n.k. föstudag með jólamat og jólaballi. Að vanda eru foreldrar hjartanlega velkomnir á jólaballið sem hefst stundvíslega kl. 14:00.

6. des. Matseðill fyrir næstu tvær vikurnar er kominn á heimasíðuna. Sjá hér

3. des. Búið er að setja inn myndir frá föndurdeginum í gær. Myndirnar er að finna á tenglinum Myndasíða.

29. nóv. Desembernámskrár deilda eru komnar á heimasíðu undir tenglinum Mánaðarnámskrá.

29. nóv. Nú er aðventan gengin í garð og leikskólinn kominn í jólabúning. Jólaföndur verður í leikskólanum n.k. fimmtudag 2. des. og vonumst við eftir að sjá sem allra flesta foreldra koma og eiga notalega stund með sínu/sínum barni/börnum í leikskólanum. Skráningarblöð hanga upp í fataherbergjum deilda.

29. nóv. Matseðill vikunnar er kominn á síðuna. Sjá hér

22. nóv. Matseðill vikunnar er kominn á heimasíðuna. Sjá hér

19. nóv. Í dag héldum við uppskeruhátíð eftir ljóðavikuna sem haldin var í tilefni af Degi íslenskrar tungu. Allir nemendur tóku virkan þátt í dagskránni og var hver deild með ljóðaflutning. Að þessu sinni voru ljóðin öll eftir íslenskar konur. Þá las skólastjóri upp ljóð og sérstakur gestur var Hrefna Hjálmarsdóttir leikskólakennari sem las upp ljóð eftir Davíð Stefánsson um X og Z auk þess sem hún kenndi okkur lag við ljóð Vilborgar Dagbjartsdóttur, Nú haustar að. Stundin heppnaðist einstaklega vel og frábært að sjá og heyra hvað ungir nemendur eru öflugir í tjáningu og textaflutningi. Hér má sjá nokkrar myndir. Hér má heyra Hrefnu syngja lagið við ljóð Vilborgar.

19. nóv. Í gær fengum við góða gesti í heimsókn þegar níu nemendur úr 6. bekk Lundarskóla komu og lásu og léku við Pálmholtsbörnin. Undanfarin ár hafa krakkar úr 6. bekk komið og lesið fyrir okkar nemendur en nú bættist við leiktími sem veitti öllum mikla gleði. Það er gaman að segja frá því að sumir gestanna voru hér í leikskóla fyrir nokkrum árum og sérstaklega gaman að hitta þá. Þann 9. desember kemur annar hópur 6. bekkinga og endurtekur leikinn. Hér má sjá nokkrar myndir.

15. nóv. Það má með sanni segja að vetur konungur sé genginn í garð með frosti og snjó hér norðan heiða. Foreldrar Sólarbarna máttu ganga í gegnum húsið í morgun þar sem lóðin var illfær vegna fannfergis. Í morgun var mokuð leið milli útganga og stærstu hengjur fjarlægðar til að tryggja öryggi barnanna í útiverunni. Börnin kunnu vel að meta allan þennan hvíta efnivið og nutu þess að klofa snjóinn upp í mitti og fá sér smá smakk. Þvílíkur ævintýraheimur.

15. nóv. Matseðill vikunnar er kominn á sinn stað. Sjá hér

15. nóv.

Þá var slökunardagur á Pálmholti og þótti börnunum ekki amalegt að fara í fótabað og fá svo tásunudd í kjölfarið. Hér má sjá dekurmyndir frá Mána.

15. nóv. Nemendur á Pálmholti eru mjög meðvitaðir um flokkun og endurvinnslu enda hluti af daglegu starfi að flokka matarafganga ýmist í moltutunnu eða hænufötu. Börnin skiptast líka á að flokka endurvinnanlegt efni sem safnast upp í eldhúsinu og hér má sjá myndir af slíkri flokkun.

1. nóv. Matseðill næstu tveggja vikna er kominn á heimasíðuna. Sjá hér

29. okt. Námskrár deilda fyrir nóvember eru komnar á heimasíðuna.

21. okt. Í vor gerði menntamálaráðuneytið könnun meðal leikskólastjóra um framkvæmd nýrra laga um leikskóla no 90 frá 12. júní 2008. Áhugasamir geta  skoðað niðurstöðurnar á þessari slóð
 http://www.menntamalaraduneyti.is/mat_uttektir/nr/3410

21. okt. Í þessari viku hafa nemendur og starfsfólk boðið foreldrum í kaffi. Á Regnboga var boðið upp á hafragraut og kaffisopa á miðvikudaginn en Máni og Sól buðu upp á kaffi og brauðbollur með fjallagrösum sem börnin tíndu á Holtinu. Bakstur fór fram í vikunni sem og marmelaðigerð og nutu foreldrar afrakstursins í dag. Bestu þakkir til foreldra fyrir góða mætingu.

18. okt. Matseðillinn er kominn á heimasíðuna. Sjá hér

11.okt. Í dag komu tveir leikskólakennaranemar til okkar sem verða hjá okkur þessa viku og svo aftur í tvær vikur á vorönninni. Þetta eru þær Anna Steinunn Þengilsdóttir sem margir kannast við frá síðasta ári og Eva Dís Guðmundsdóttir. Anna Steinunn verður á Mána undir handleiðslu Áslaugar en Eva Dís á Sól undir handleiðslu Helen. Þær eru báðar á lokaári í leikskólakennaranáminu og bjóðum við þær hjartanlega velkomnar.

4. okt. Nú er matseðill næstu tveggja vikna kominn á heimasíðuna. Sjá hér

30. sept. Í dag var haldin brunaæfing í leikskólanum og gekk hún mjög vel fyrir sig. Brunaviðvörunarkerfið var ræst klukkan 9:00 og þustu allir út að sandkassa ýmist á inniskóm eða sokkaleistum. Um það bil 30 sekúndur liðu frá kallinu þar til allir voru komnir út og verður það að teljast mjög gott. Eldvarnareftirlits- og slökkviliðsmenn mættu á staðinn og fylgdust með. Hér má sjá nokkrar myndir.

29. sept. Þann 23. september hélt Foreldrafélag Pálmholts aðalfund sinn. Mæting var nokkuð góð eða rúmlega 45%. Farið var yfir skýrslu stjórnar, reikninga félagsins, kosið var í nýja stjórn og foreldraráð og einnig var kosinn fulltrúi foreldra í umhverfisnefnd. Þá var farið yfir lög félagsins, gjöld og önnur mál rædd. Hér má sjá nokkrar myndir frá fundinum og hér má sjá mynd af nýrri stjórn foreldrafélagsins.

24. sept. Búið er að gera breytingar á SMT-kennsluáætlun Mána og Regnboga og eru foreldrar beðnir um að kynna sér þær á SMT-tenglinum.

23. sept. Eins og gestir hafa vafalítið tekið eftir er verið að breyta útliti síðunnar í því augnamiði að gera viðmótið aðgengilegra. Búið er að lagfæra heiti deilda eftir skipulagsbreytingar innanhúss og ættu nú allir að rata á sína síðu :-) Ekki er búið að tengja alla hnappa og eins á eftir að gera fleiri breytingar sem vonandi verða til bóta.

22. sept. Það er alltaf sannkölluð hátíðarstemning á Pálmholti þegar moltutunna er losuð og í dag var einmitt einn slíkur. Nemendur og kennarar tóku höndum saman og kepptust við að draga þessa líka fínu og næringarríku moltu á snjóþotum. Moltan var ýmist sett hjá berjarunnunum, rabarbaranum eða safnað í haug þar sem fyrirhugað er að koma upp  matjurtagarði. Vonir standa til að þessi áburður auki til muna alla uppskera næsta sumar. Sumum þótti lyktin svolítið skrýtin og jafnvel ekkert sérstök á meðan aðrir töluðu um vellyktandi :-) Hér má sjá nokkrar myndir.

22. sept. Samstarf milli leik- og grunnskóla hefur verið að aukast jafnt og þétt undanfarin ár enda orðin skylda samkvæmt lögum. Leikskólarnir á efri brekkunni, þ.e. Pálmholt, Flúðir og Lundarsel eru í samstarfi við Lundarskóla. Samstarfið snýst að miklu leyti um að gera skiptin milli skólastiga aðlaðandi fyrir nemendur og koma í veg fyrir óþarfa spennu. Einnig hafa kennarar skólastiganna verið að hittast, lesa fagbækur og miðla þekkingu og reynslu, allt í því augnamiði að gera skólaskiptin samfelld. Samstarfsskólarnir eru búnir að vinna áætlun fyrir skólaárið 2010 - 2011 og eru foreldrar elstu barnanna beðnir um að kynna sér hana. Sjá hér

22. sept. Nú er búið að vinna upp áætlun fyrir kennslu og upprifjun á SMT skólafærninni okkar fyrir haustönnina. Máni og Sól hafa sitt hvora áætlunina en á Regnboga bíðum við með innlögn þar til eftir áramótin. Foreldrar allra nýnema fengu kynningu á agastefnu leikskólans í september. Eins og sjá má í áætluninni er verið að draga úr hvatningu í formi umbunar en þess í stað lögð mun meiri áhersla á félagslegu hvatninguna. Hér má sjá áætlanirnar fyrir Sól og Mána.

20. sept. Matseðill vikunnar er kominn á heimasíðuna. Sjá hér

17. sept. Aðalfundur foreldrafélagsins verður haldinn fimmtudaginn 23. september. Sjá nánar í auglýsingu frá stjórn foreldrafélagsins. Hér

13. sept. Í dag komu Eiríkur Björn Björgvinsson bæjarstjóri ásamt Hrafnhildi Sigurðardóttur leikskólafulltrúa í stutta heimsókn. Með heimsókninni var bæjarstjóri að skoða leikskólann og kynna sig fyrir starfsfólki og nemendum skólans.

10. sept. Í dag var sulludagur og skemmtu börnin sér konunglega við alls kyns tilraunir og vatnsleiki í veðurblíðunni.

10. sept. Í dag fengum við heimsókn frá leikskólanum Hulduheimum í Grafarvogi en sjö starfsmenn komu og kynntu sér starfið okkar.

8. sept. Í tilefni af Degi læsis, sem er í dag, var ákveðið að efna til læsisviku á Pálmholti og minna þannig á mikilvægi málefnisins. Tveir elstu árgangarnir heimsækja Amtsbókasafnið í vikunni og í gær bökuðu nemendur stafabrauð og gerði hvert barn sinn staf. Hápunktur vikunnar var svo í dag þegar Heiðdís Norðfjörð rithöfundur með meiru heimsótti okkur og las frumsamda sögu fyrir tvo elstu árgangana. Guðrún Nunna var fengin til að koma og lesa fyrir þriggja ára börnin á Mána og Hugrún las fyrir Regnbogabörnin. Í hádeginu var svo snædd stafasúpa og stafabrauð þar sem mikil umræða spannst gjarnan um bókstafi og hvernig þeir geta myndað orð sem geta síðan orðið að sögum og ævintýrum.

3. sept. Matseðill fyrir næstu tvær vikur er kominn á heimasíðuna. Sjá hér

3. sept. Skóladeild og fjölskyldudeild Akureyrarbæjar munu í  haust standa fyrir PMT-námskeiði (Parent Management Training) fyrir foreldra barna með ofvirkni og /eða athyglisbrest. Miðað er við börn á aldrinum 5 - 10 ára. Sjá nánar í meðfylgjandi auglýsingu. Hér

31. ág. Námskrár septembermánaðar og fréttabréf frá deildum eru komnar á heimasíðuna. Sjá tengil hér til hægri.

31. ág. Skóladeild Akureyrarbæjar hefur gefið út upplýsingabækling um alla leikskóla sem starfa innan sveitarfélagsins. Þar má finna upplýsingar um hvern leikskóla ásamt ýmsum hagnýtum upplýsingum. Sjá hér

27. ág. Veðrið lék við okkur í dag og Sólarkennarar og börn ákváðu að nýta sér blíðuna og færa starfsemina út undir bert loft. Hér má sjá myndir frá samverustund og hádegisverði.
 

27. ág. Í dag byrja þrír nýjir starfsmenn hjá okkur. Það eru þær Alfa Dröfn Jóhannsdóttir, Berglind Ólafsdóttir og Málmfríður Sigurðardóttir. Berglind verður í tæplega 70% starfi en Alfa Dröfn og Málmfríður í 100% stöðum. Við bjóðum þær innilega velkomnar til starfa á Pálmholti.

27. ág. Í dag kveðjum við Baldvinu sem heldur suður til áframhaldandi náms í leikskólakennarafræðum. Berglind Bergvinsdóttir vinnur sinn síðasta dag á þessu ári en hún og Sigrún Finnsdóttir fara í níu mánaða leyfi til að stunda nám við HA. Við óskum þeim öllum góðs gengis á menntabrautinni.

20. ág. Á mánudaginn, 23. ágúst byrja fimm börn í aðlögun á Regnboga, öll fædd árið 2008. Aðlögunin fer fram með þátttöku foreldra þannig að það verður margt um manninn þessa daga meðan á aðlögun stendur. Þann 9. ág. komu fimm börn í aðlögun á deildina og var þá sama fyrirkomulag haft á og gekk það býsna vel. Í lok ágúst hættir eitt barn á Mána og annað byrjar í aðlögun þar fyrsta sept. Við hlökkum til að fá þessi nýju börn og að hefja samstarf við alla þessa nýju foreldra.

20. ág. Nú er sumarstarfsfólkið okkar að hverfa af vettvangi eitt af öðru. Í gær kvöddum við Ólaf en Baldvina verður hjá okkur út næstu viku. Við þökkum þeim kærlega fyrir samstarfið í sumar og óskum þeim góðs gengis á nýjum vettvangi.

16. ág. Matseðill vikunnar er kominn á sinn stað. Sjá hér

16. ág. Í dag byrjuðu tveir nýjir starfsmenn hjá okkur. Guðný Lára Gunnarsdóttir grunnskólakennari verður í 75% starfi á Sól og Lilja Björk Jósepsdóttir tekur við af Þóreyju sem aðstoðarmatráður. Við bjóðum þær hjartanlega velkomnar til starfa á Pálmholti.

Þessa dagana erum við iðin við að kveðja fólk, í dag 13. ágúst kvöddum við hana Kittý okkar með söknuði.
 Hún heldur nú suður yfir heiðar og fer að vinna í leikskólanum Ægisborg eftir 16 ára starf á Pálmholti.

Í dag 6. ágúst kvöddum við hana Þóreyju okkar, hún heldur nú suður yfir heiðar til nýrra ævintýra

Sumarlokanir leikskóla á Akureyri
 2012 - 2014
Sumarið 2012 lokar Pálmholt frá 9. júlí til 3. ágúst. Opnum þriðjudaginn 7. ágúst.